أيوه كعكة موز...ماهو مش هيبقى عندك شجرة موز و تعمل كعكة كافيار و العياذ بالله.....المقولة دى بفكر نفسى بيها على طول...قيس بقه عليها موز برتقال ليمون اى حاجه...دى حكمة كبيرة مغزاها هو الرضا... و استغلال اى حاجه ربنا وهبهالنا......حواسنا امكانياتنا ايا كانت بسيطه ممكن نعمل بيها حاجه...أنا لا أجيد الوعظ و لا أتحمله...بس أنا بوعظ نفسى و لو وصلكم معنى اللى أقصده و حسيتوه جربوه و شجعوا بعض عليه....انهارده أول تحدى للنادى...نادى ايه؟؟ هنقول تانى...ده نادى الكترونى ...تجمع للناس اللى بتحب تخبز و بتحب المطبخ بصفة عامه...المكان ده متنفس لناس كتيره عايزة تشغل نفسها و تشجع نفسها و تحسن من اداءها فى امور كتير....المكان ده حافز لينا اننا نتميز فى حاجه بنحبها و نجود فيها...احنا هنا كلنا بنأثر و نتأثر...أرجو ان الهدف اللى انا متخيلاه يتحقق....اول كل شهر هنزل وصفه و هندخل نقراها و ننفذها و ننزل صورها على جروب خاص بالنادى على الفيس بوك...بس الشرط الوحيد ان الصور ما تنزلش قبل يوم 28 فى الشهر من 18 الى 30 او 31 هننزل الصور و اخر يوم هيتم التصويت ثم التحكيم على أفضل صوره...اداء و تصوير و تنفيذ و ابداع فى الفكرة و التقديم...الصوره الفايزة هتنزل هنا على البلوج مع الوصفه كل شهر مع نبذة عن الفايز بيحب ايه و هو مين الى اخره....لجنة التحكيم هتبقى 3 افراد...شيف احمد شندى باعتباره اول راجل ينضم للنادى و بعدين أنا و كمان فى شخصيه تالته محبوبه هعلن عنها بعد قليل....يالا بقه على الوصفه يا جدعان كفايه لت و عجن "لا مش كفايه...انتوا لسه شفتوا حاجه؟؟ :))"
المقادير:-
1 كوب زبدة بدرجة حراره الغرفه او ما يعادلها من وزن..250 جرام
4 بيضات "حجم متوسط"
4 موز كبير او 6 صغير
نصف ملعقه صغيره فانيليا
1ملعقه صغيره بيكربونات
نصف كوب لبن رايب
كوب و نصف سكر
3 كوب دقيق متعدد الاغراض..مضاف له 2 ملعقه صغيره بيكنج باودر
المكونات كلها تكون بدرجة حرارة الغرفه
الوصفة:-
اضربوا الزبده مع السكر مع الفانيليا لحد ما تحصلوا على قوام كريمى...ضيفوا البيض بالتدريج...مع الضرب بين كل اضافه و اللى بعدها...اهرسوا الموز جيدا و ضيفوه مع مقدار اللبن و انخلوا الدقيق المضاف له البيكنج باودر و البيكنج صودا...و ابدأوا باضافه الدقيق بالتبادل مع اللبن و الموز على ان تخلطوا جيدا بين كل اضافه و التانيه...بمعنى نزلت نص السائل مع الموز و بعدين نص الدقيق و اضرب و اكمل بالباقى....بس خلاص...تنفيذى للكيكة هنا كان تنفيذ قديم...هعملها معاكم تانى بتنفيذ جديد...أنا زينتها بكريمه و شرائح من جوز الهند المحمص و كمان رشة كاجو...شوفوا انتوا تحبوا تقدموها ازاى و حطوا لمستكم....عايزين نشوف الهمه....التحدى شكله سهل....بس عايزين نشوف ابداعكم فى السهل ايه :)))
الصورة:-
الفكره هى اننا هنفذ الوصفه بحذافيرها و نلعب فى التقديم زى ما احنا عايزين...فهمتوا قصدى ؟؟